شعبان عبد الرحيم

القاهرة / يستعد الفنان الشعبي المصري شعبان عبدالرحيم الشهير بـ"شعبولا "لتسجيل أغنيته الجديدة تحت عنوان "الحرية انضربت" التي كتبها المؤلف إسلام خليل. 
وقال شعبولا في تصريح خاص لـ"العربية.نت": "اتصلت بإسلام قولت له يا نهار اسود شوفت إسرائيل عملت ايه في الاسطول، قالي آه بتابع وما تقلقش يا شعبولا هكتبلك أغنية لا يمكن تعديني مناسبة زي دي".
وأضاف شعبولا "ايه اللي بيحصل يا ناس بقى يعني منفعش معاهم اغنيتي الشهيرة "أنا بكره إسرائيل" أقولهم ايه العالم البجحة دي. بعد إحساس الكره الرهيب اللي كل العرب بيكرهوه لإسرائيل اغنيلهم اقولهم ايه؟ بنكرهكم كمان وكمان".
وتابع: "اللي عملتوا اسرائيل تصرف غبي وعبيط، والله لو انا كنت على السفينة كنت كلتهم بأغنياتي. بقى معقول ناس جدعان موديين أكل لناس محاصرة ينضربوا ويموتوا. هما فاكرنا مش رجالة ولا ايه دا إحنا رجالة اوي وناكل الزلط بس مش خاينين زيهم ولا بنعرف نلف ولا ندور، بس نعرف كويس نتعامل مع البطجية الاسرائيليين".
واعتبر شعبولا أن موقف تركيا مشرف جداً وموقف الحكومة المصرية قوي وشديد خاصة "بعدما فتحوا الابواب (المعابر) علشان يروحوا وييجوا براحتهم لاننا اخوة وعرب".
يُذكر ان شعبولا له عدة اغنيات ذات شهرة واسعة مثل اغنية بحب "عمرو موسى وبكره اسرائيل"، وأغنية هبطل السجاير. كما غنى للرئيس المصري حسني مبارك في عيد ميلاده، وأعلن رفضه إضراب 6 إبريل في اغنية.

كلمات الأغنية
الحرية انضربت والعالم كله شاف
علشان الكل يترعش ويترعب ويخاف
اكمن مفيش ردع والكل شايل ايديه
هنموت ويبقى الوضع كما هو عليه
في كل دقيقة بالوه وفي كل ثانية قتيل
ملعون ابوكي دولة يا دولة اسرائيل
الناس هيجلها حسرة من الشغب ومن السكوت
وغزة لسه محاصرة وعلى البطيء بتموت
العربي والاجنبي اتقتلوا في الحرية
شوفت السلام والنبي والطيبة الاسرائيلية
ضربوا الحرية عادي واللي في دماغهم حصل
ولا اللي راحوا رجعوا ولا اي شيء وصل
الهم زاد والغم والبركة في اسرائيل
خلو الحرية دم عمال يوماتي يسيل
اياك حماس وفتح يحصل بينهم وفاق
ويحسوا برأي مصر ويمضوا الاتفاق
انضربت الحرية عيني عينك بالنهار
علشان الموت يعشش ويفضل الحصار
لو كنا وحدة يا عرب كان حالنا يبقى جميل
ولا الاسطول انضرب ولا كبرت اسرائيل